اوبر و كريم و دخول ان درايفر فجأة و سحبه للسوق منهم؟
من وجهة نظري ان في سبب اساسي خلي في احتياج لتطبيقات زي اوبر و كريم و انهم استبدلوا التاكسي و اكتسحوه
و هو انهم بيقدموا نفس التجربة بس بدون اي مشاكل او ارهاق و كمان بتكلفة محسوبة و محددة و عادلة و الشئ الأهم فعلا اللي خلاهم موجودين هو عنصر الأمان!
و اللي كان اكثر حاجات بتضرب البيزنس ده لما يتسمع ان حصل حالة سرقة او خطف لأي عميل في احدي الرحلات اليومية
و قدروا يوفروا ده من خلال توفير قسم خدمة العملاء! و لو تفتكروا ده كان سبب اصلا في وجود كريم منافس قوي لأوبر في البداية
ان اوبر كانت تفتقر لخدمة العملاء من خلال اتصال هاتفي و عشان اوبر يخلص علي المنافسة دي و علي ان كريم كانت قوته في خدمة العملاء و الدعم بتاعهم
و انه معرفش ياخد السوق من كريم مهما صرف فقرر يشتريه!
بعد ما اشتراه قرر يطبق عناصر ال Profit Optimization انه يوفر اي موارد يمكن توفيرها بدون تغيير التجربة الاساسية للعميل
فبدأ يحول قسم خدمة العملاء لأدوات اونلاين و روبوتات للرد و تعامل بالأيميلات بياخد وقت كبير
و ده عشان يقلل التكاليف البشرية الكبيرة في بيزنس زي دهو بعدها قرر يزود ارباحه اكتر بأستخدام ال Rush Factor اللي بقي اغلب الوقت عاليلا
و كمان في ابحاث اتعملت علي اوبر و سلوكه و تم اكتشاف انه بيعلي ال Factor ده ساعات بناءا علي تجربة العميل نفسه
يعني مثلا بيشوفك كل يوم بتعمل مشوار ثابت في توقيت معين زي مثلا بتروح الشغل بتاعك كل يوم في نفس المعادفيقوم اوتوماتيك يعلي ال Fair اللي هاتدفعها
حتي لو مفيش ساعة ذروة حقيقية كل ده عشان يزود هامش الربح الخاص بيه.
كل ده و نسبة خسارته للعملاء نتيجة التغييرات قليلة لو بنقارنها للمكاسب اللي نتجت عن التوفير اللي حصل و تعظيم الدخل اللي حصل برده.
بس اللي مخدوش بالهم منه، انهم استغنوا عن الميزة الحقيقية اللي كانت مصعبة السوق علي اي حد يخش قدامهم
ان العميل كان بيحس بالامان من خلال دعم خدمة العملاء فبقي السوق مفيش حد فيه بيقدم التجربة شاملة الميزة التنافسية دي
وبالتالي السوق بقي مفتوح للي هايقدم سعر افضل فقط!
و ده اللي حصل مع دخول In Driver عرض ٦ شهور بدون عمولة للكابتن و في وقت الكباتن كانوا بيشتكوا من ان عمولة اوبر و كريم زادت و البونص اتلغي
(ده طبعا برده كان ضمن سياسة توفير النفقات و تعظيم الدخل)
بالأضافة انه وفر للعميل تسعير عادل بدون اي Rush Factor فببساطة العميل بدأ يفكر هو انا ليه افضل استخدم اوبر او كريم و ما استخدمش التطبيق الجديد ده؟
ببساطة ما لاقاش اجابة مقنعة عشان الميزة التنافسية اللي كانت مصعبة التنافس علي اي حد بيدخل جديد راحت و اتبخرت فكله نقل استخدامه للتطبيق الجديد
اللي برده مفيهوش اي عنصر امان و مشاكله في الجزء ده قد تكون اكبر بس للأسف بخ السوق بقي معتمد علي تنافس اسعار فقط!
بس يا سيدي فلو انت فاتح اي بيزنس مهم تبقي عارف ايه الميزة التنافسية اللي تصعب علي اي منافس حالي او جديد ليك انه ياكل منك السوق
و مهم دايما انك ما تحاولش تلغيها حتي لو حساب تعظيم الارباح! دي طبعا وجهة نظر بسيطة تتفق او تختلف معاها .
