اننا فى داخلنا الأعمق نحب الضحكة و البسمة ، الضحك جميل و نحن نحب من يجعلنا نضحك.
بعد ما إتكلمنا في الجزء الأول عن دور الفكاهة والضحك في الإعلان وأهميتها، وعن اللي بينجح أو يبوظ النوع ده من الإعلانات؛ تعالوا نتكلم النهاردة عن أنواع الإعلانات ذات الطابع الفكاهي/المضحك. وخد بالك إننا مش عايزين نقول الأنواع عشان بعد كدة لما تشوف إعلان بيضحّك تقول هو ده النوع الفلاني على قد ما إنك تتعلّم إيه هي الدخلات أو الطرق اللي تقدر تعمل من خلالها إعلان بيضحّك من خلال فهمك لكل نوع وبيستخدم في إيه. وفي النهاية إنك تعمل فكرة إعلان أصلاً فديه موهبة قبل ما يبقى علم أو خبرة، صحيح العلم والخبرة مهمين عشان تعمل الإعلان بالطريقة الصح، لكن برضه الإبداع موهبة قبل أي حاجة. والموهوبين عارفين نفسهم، أو لسه بيكتشفوا نفسهم. نرجع لموضوعنا ..
* عشان تعمل إعلان يضحك الناس (يمكن شايفها أصعب حاجة في الدنيا) يبقى هاتعمل حاجة من 7 حاجات:
1.مفاجأة Surprise Humor
2.مقارنة Comparison Humor
3.تجسيد/ تشخيص Personification Humor
4.مبالغة Exaggeration Humor
5.تورية Pun
6.سخرية Sarcasm
7.سخافة Silliness
1.مفاجأة surprise Humor
– أكتر نوع من الإعلانات المضحكة اللي بيجذب إهتمام الناس.
– إختيارك الأول لو عايز تعمل إعلان في التليفزيون TV Advert
– لو عايز تعمل النوع ده يبقى إخلق مواقف غير متوقعة. إبدأ إعلانك بمشهد تخدع بيه الجمهور وبعدين إعمل مفاجأة ما في الآخر. يعني مثلاً إنك تجيب مشهد لراجل بيغسل عربيته وبيبوسها من كتر ما هو بيحبها، فتيجي صخرة كبيرة عليهم هم الإتنين، فيجري على أي حاجة تافهة زي مثلاً علبة المعجون اللي كان بيلمّع بيه العربية ويحميه بإيده ويسيب العربية تتكسر عادي. فإنت هنا فاجئت الجمهور بإن الراجل ضحى بأكتر حاجة بيحبها عشان طلع إنه بيحب حاجة تانية أكتر!.
– اللي يبوظ إعلان زي ده إن الناس أذكياء للدرجة اللي تخليهم يتوقعوا الإعلان .. فأهم حاجة إنك تلجأ لأكتر اختيارات/نقلات غير متوقعة، وإلا هاتقع في فخ الإبتذال! ، ويفضل إنك ماتستخدمش إيفيه أو مشاهد الناس شافتها قبل كدة ومتعودة عليها. ده لو إنت عايز فعلاً إعلانك الناس كلها تشيره وتتكلم عليه، يبقى لازم حاجة جديدة.
– أمثلة:
2.مقارنة Comparison Humor
– مش مشهور أوي.
– يستخدم أكتر في الإعلانات المطبوعة Printed Ad مش في التليفزيون TV Advert
– لو عايز تعمل النوع ده يبقى تحط حاجتين جنب بعض: إخلق علاقة مقارنة كوميدية زي إنك تجيب حاجة ما حصلت قبل وبعد استخدام المنتج بتاعك، أو لو الناس استخدمت المنتج بتاعك ولو ماستخدمتهوش هايحصل ايه .. إلخ إلخ.
– خد بالك: اللي بتعمله براندات زي برسيل وإيريال وبريل في المقارنة بين نظافة “كذا” قصاد نظافة “كذا” إسمها مقارنة آه بس مش إعلان بيضحك، ده نوع تاني خالص من الإعلانات هانتكلم عنه بعدين. واللي بتعمله شركات الموبايل لما بتجيب صورة متاخدة بالجهاز بتاعها ونفس الصورة متاخدة بجهاز تاني عشان تعبّر عن جودة الكاميرا بتاعتها برضه من نفس نوع الإعلانات اللي هانتكلم عنه مش comparison humor .. ماتنساش إن المقارنة اللي بنتكلم عنها هنا مقارنة بتضحّك. عشان كدة بنقول إنه مش مشهور أوي.
– أمثلة:
3.تجسيد/ تشخيص Personification Humor
– بيستخدم في الإعلانات التليفزيونية TV Adverts والمطبوعة Printed Ads
– لو عايز تعمل النوع ده من الإعلانات: إدي صفة أو فعل خاص بالبني آدمين لحيوان أو نبات أو جماد. زي إنك تجيب معزة بتستحمى، وردة بتتكلم، كاميرا بتشرب سجاير.
– استخدم النوع ده لما تبقى عايز تفكّر الناس بالمنتج بتاعك، مش لو عايز تعرّفهم بيه وتقول معلومات كتير.
– عيب النوع ده إنه أحياناً ببقى “سخيف” فابعد عن الإبتذال، والعيب التاني إن الناس ممكن تزهق منه بسهولة، والحل إنك تعمل في شكل “سلسلة إعلانات” تحت نفس الفكرة العامة.
– أمثلة:
4.مبالغة Exaggeration Humor
– بيستخدم كثيراً في الإعلانات التليفزيونية TV Adverts وفي المطبوعة.
– لو عايز تعمل النوع ده من الإعلانات يبقى إعمل موقف/صورة مبالغ فيها. إعمل تكبير/تصغير للأبعاد الحقيقية للحاجة اللي بتتكلم عنها.
– في دراسات قالت إن “الرجال” شايفين النوع ده من الإعلانات متوّقع جداً.
– مشكلة النوع ده من الإعلانات إن الناس هاتفتكر المبالغة نفسها ومش هاتفتكر المنتج، عشان كدة حاول تربط المبالغة اللي هاتعملها بالمنتج بتاعك عشان يفتكروه أكتر.
– أمثلة:
5.تورية Pun
– من الأنواع النادرة في التليفزيون TV Advert.
– من الصعب إنك تعمل تورية يفهمها كل الناس، عشان كدة يفضل إستخدام النوع ده من الإعلانات مع استهداف فئات معينة، وبالذات في الفئات العمرية.
– لو عايز تعمل النوع ده من الإعلانات يبقى إستخدم أجزاء من اللغة عشان تخلق معنى جديد بالصورة.
– أمثلة:
6.سخرية Sarcasm
– من أكثر الأنواع المشهورة في الإعلانات المطبوعة Printed Ads
– يرجى الحذر عند إستخدامها في التليفزيون TV Ad وعلى السوشيال ميديا لأنه من السهل جداً إن الناس تهاجمه بدل ما يعجبها.
– لو عايز تعمل النوع ده من الإعلانات يبقى إخلق موقف/ رد فعل تهكمي وقح ، وكأنك بتشتم الناس أو بتسخر منهم/ بعض تصرفاتهم مثلاً.
– النوع ده من الإعلانات (المحتوى) على السوشيال ميديا بقى منتشر في مصر بشكل كبير وقدر يفرض مساحته وأسلوبه، وبقت في براندات كتير دلوقتي (متوسطة – كبيرة الحجم) بتستخدمه ضمن محتواها، يمكن أكتر براند اتشهر بيها الفترة الأخيرة كانت صفحة ميرندا مصر، وأكتر الصفحات اللي اتشهرت بيها كانت Egypt Sarcasm Society. عشان كدة أعتقد إن بتوع السوشيال ميديا اللي بيعرفوا يكتبوا في السخرية كويس أوي وبيخلقوا النوع ده من المحتوى قليلين، وعندهم فرصة للشغل أكتر من غيرهم.
– أمثلة:
– وده بوست كنا نزلناه إمبارح على صفحتنا لبراند إسمه ديلبي:
(وخد بالك؛ لما تحكم على الحملة وحشة ولا حلوة، إنك هاتحكم مرة كمستهلك -ده لو انت الفئة المستهدفة- ومرة كماركيتيير -آخذاً في الإعتبار نوع المنتج نفسه وإنه استخدم السخرية اللي هاتعجب البعض والبعض لأ. ولو إنت هاتدي الحملة أقل من 2 من 10 ، فخد الواجب ده واعمله مع نفسك: لو إنت مسئول عن منتج لعلاج سرعة القذف ومطلوب منك تعمل خطة للمحتوى والإعلان ، هاتعملها إزاي وهاتقول إيه؟)
7.سخافة Silliness
– من أنواع الإعلانات المشهورة في التليفزيون TV Ad والمطبوعة Printed Ad
– لو عايز تعمل النوع ده من الإعلانات يبقى إخلق مواقف سخيفة بيمر بيها أشخاص مع وشوش بتضحك. زي مجموعة رجالة بعضلات ومجانص وترابيس بيجروا على صوابعهم لأن رملة الشاطيء سخنة.
– أمثلة:
فاضل نصيحة واحدة: من عيوب الإعلانات الكوميدية إن الناس بعد فترة بتكون حفظت النكتة وبالتالي لو شافت إعلانك تاني مش هاتضحك وهاتفقد أهم ميزة فيه، فيُفضّل إنك تعمله في شكل series يعني حلقات متنوعة أو كذا نسخة منه بمواقف مختلفة تحت -نفس الفكرة طبعاً- زي ما بنشوفها في أي حملة إعلانية.
