من احلي و اسهل الحاجات اللي تخليك تاخد قرار يخص ترتيب الاولويات في كل حاجة.
و هو مشهور جدا عند اي CTO او حد مسئول عن البرمجة و ينفع يتطبق علي كل حاجة بتدخل علي خطتك او حتي علي ال To-Do list بتاعتك
فانت خدها واحدة واحدة:
١- هل الحاجة دي مهمة و هل ده وقت مناسب ليها؟لو لا يبقي فاكس ما تحطهاش في بالك اصلا زحلقها >> لو اه خش بيها علي السؤال التاني
٢- هل دي تاسكاية سهل تنجزها او مشكلة تقدر تحلها بسرعة؟ لو لا اجلها بس حطها في نظام عمل مترتب شوية (ممكن تستخدم نظام Kanban Board) > هشرحه في اخر البوست
لو اه يبقي تخش علي السؤال التالت
٣- هل الحاجة دي مستعجلة او لازم تتحل حالا او هايحصل مصيبة لو ما اتحلتش ولا ينفع تتأجل شوية؟ >> لو اه هاتحصل مصيبة يبقي ابدأ حلها دلوقت!
لو لا يبقي انقلها في ال Kanban Board بس كدة يا سيدي اعمل كدة في كل حاجة في حياتك هاتلاقي نفسك انتاجيتك اعلي و كمان بتتحرك في اتجاه تحقيق هدفك الاساسي مش بتبعد عنه ولا بتتشت عن العمل عليه كتير.
تعالي بقي نرجع لل kanban
كان فى نظام لواحد خريج هندسة قسم انتاج مشروع تخرجه كان علي احد خطوط انتاج العربيات، كان الهدف من المشروع لو انا متذكر صح ان خط الانتاج ده بنفس كل الموارد اللي عليه سواء بشرية او ادوات بدل ما يطلع ١٠ عربيات في الساعة الواحدة يطلع ١٣ عربية
و ده عن طريق حاجة اسمها ال Lean Management و اللي هدفها انك تحاول تشيل اي wastes من ال processes & flows عشان الانتاج يتم بأكثر شكل سلس
وهنا بقي اتعلمنا حاجة اسمها ال Kanban و دي متاخدة من كلمة يابانية اسمها Kamban و معناها Billboard او ببساطة حاجة بتوضحلك ال Capacity بتاعت الشغل بتاعك بشكل مرتب و منظم و دي حاجة مندرجة من حاجة تانية اكبر اسمها Just In Time (JIT)
و اللي هدفهم تعرف ايه اللي محتاج يخش الانتاج و ايه لا و امتي يخش الخط وامتي يتأجل وكمان يخش بكمية قد ايه النظام ده اتطور جدا في الادارة و اتخاذ القرار
و قالك يا سيدي قسم كل حاجة بتشتغل عليها ل ٣ مراحل:
– Backlog or Scheduled tasks
– In Progress
– Done
>> الاولي ببساطة هاتكتب كل حاجة جاتلك عشان تنفذها بس مش محتاجة تتنفذ حالا بس برده ما ينفعش نلغيها زي ما قولنا في البداية
تاخد كل واحدة و تديها مدة تنفيذ و تاريخ بدأ و تاريخ انتهاء و طبعا التواريخ دي هاتعتمد علي عدد التاسكات اللي هاتحطها اصلافي ال backlog و مين ليه اولوية علي مينو كل ما تدخل تاسك جديدة تعيد ترتيب كل التاسكات اللي في ال backlog ده.
> الثانية بقي واضحة و صريحة هي كل الحاجات اللي بالفعل انت بدأت في تنفيذها و كل واحدة ليها تاريخ ابتديت فيه و مدة تنفيذ و تاريخ انتهاء و ده مش بيغيره غير لو دخل تاسك جديدة هاتحصل مصيبة لو ما اتنفذتش حالا ساعتها بتنفذها و تعيد تظبيط تواريخ الانتهاء في كل تاسكات ال In progress
> الثالثة بقي هي الحاجات اللي خلصت كل واحدة تقول هي كان محطوطلها وقت قد ايه و خدت فعليا وقت قد ايه و شوية ملحوظات عليها عشان التوثيق للتعلم فيما بعد
طبعا ده عشان يتم بشكل سهل و بسيط تقدر تستخدم ادوات اونلاين تساعدك علي ده بسهولة جدامنها اداة اسمها Trello
تقدر تشوفه من هنا:http://bit.ly/TrelloNZapier
