اللوجو و ألوانه هو أكتر حاجة بنفتكرها من البراند القوية ، وهو كمان اللي بيوصل لناأكبر جزء من اللي البراند اللى عايزة تعبر بيها عن نفسها. عشان كدا ماينفعش اللوجو يكون كتابة للأسم وشوية ألوان وأنتهينا .. ودي بعض البرانداتالعالمية اللي قررت انها توصل رسائل خفية من خلال اللوجو الخاص بيها .. لـ اللي يركز:
(1) FedEx
في المسافة ما بين حرف الـ E و الـ X بيتكون سهم صغير ، و بيعبر عن السرعة و خدمة التوصيل الدقيقة ، ودول هم العاملين اللي بيركزوا عليهم في خدماتهم .
(2) Amazon
السهم الأصفر اللي بيبدأ عند حرف الـ A و حرف الـ Z بيعبر عن التنوع الكبير اللي بيقدموه .. مافيش حاجة مش هاتلاقيها .
يعني زي ما بنقول عندنا بالمصري كدا من الأبرة للصاروخ .
(3) Gillette
جيليت هي براند لأمواس حلاقة بالأساس زي ما احنا عارفين ، ولو ركزنا في اللوجو هانلاقي ان فيه انحراف / جزء مقطوع من نهاية حرف الـ G و مكمل لنقطة حرف الـ I ودا بيرمز لفكرة الأمواس الحادة و القاطعة اللي هم بيروجوا لها .
(4) Cisco
سيسكو هي واحدة من اكبر الشركات اللي بتتعامل في مجال تقنية المعلومات من ناحية القيمة السوقية .
الخطوط اللي في اللوجو مش بس بتعبر عن الموجات المغناطيش الكهربائي لكن كمان بتشير لجسر جولد جات Golden Gate المعروف في سان فرانسيسكو و اللي هي المدينة الام لشركة سيسكو .
(5) Le tour de france
طواف فرنسا هو واحد من أصعب السباقات في مجال الدراجات الهوائية على مستوى العالم و بيتكون من 21 مرحلة .
الدايرة الصفراء في اللوجو مش بس بتشير للوقت المشمس اللي بينطلق فيه السباق وهو شهر يوليو لكن كمان الدايرة دي مع حرف الـ R بيكونوا شكل سائق دراجة هوائية بمنتهى الذكاء و الفن
(6) Kolner Zoo
حديقة الحيوانات في مدينة كولونيا الألمانية .. مش بس بذكاء بتجمع بين 3 حيوانات في شكل واحد زي ما هو باين
لكن كمان لو ركزنا في الأرجل الخلفية للفيل هانلاقي شكلين مميزين وهم شكل أبراج كاتدرائية كولونيا المبني العريق و اللي له طراز مميز و اللي بيقول البعض انه مدينة كولونيا ماكنتش هاتكون مميزة بأي شكل من غير مبني الكاتدرائية دا .
بالتالي لما تم دمج اشهر معلم معماري في اللوجو مابقاش مجرد لوجو لحديقة حيوانات في اى مكان ، لكن بقى لوجو حديقة الحيوانات في مينة كولونيا الألمانية
(7) Baskin Robbins
باسكن روبنز هو البراند المشهور اللي بيقدم نكهات متنوعة و غنية للأيسكريم .. تحديدا 31 نكهة .. وهو دا الرقم اللي تم دمجه بذكاء في الحروف الاولى من اسم البراند و اللي بتتوسط اللوجو .
(8) Museum of London
متحف لندن اللوجو بتاعه بيتمتع بألون مميزة و جذابة للعين بالرغم من بساطته .. لكن الحقيقة ان الدواير العشوائية الملونة دي بتمثل شكل مدينة لندن وحدودها و التغيير اللي حصل في الحدود دي على مدار التاريخ .
(9) Beats
براند غني عن التعريف لكل الهيدفون .
واللوجو بتاعهم بالرغم من بساطته في انه بيستغل حرف الـ b لكن شكله ووضعه على الدايرة الحمراء بتوحي بأنه شخص لابس الهيدفون .
(10) NBC
شبكة ان بس سي الاعلامية اللوجو بتاعها عبارة عن مجموعة من الالوان المختلفة .. يمكن يوحي للوهلة الاولى ان دا بيدل على التنوع اللي بيقدموه لكن مع التركيز في الجزء الأبيض اللي في النص بنلاقيه بيشكل راس وجسم طاووس و ان الألوان الباقية دي هي الريش بتاعه .. و الرسالة من وراء اللوجو دا هو ان شبكة ان بي سي فخورة بكل اللي بتقدمه .
بس كدا ..