فى البداية، يعني نفترض ان في عميل بيتفق معاك علشان تمسكلة شغل السيو والتسويق الالكتروني بتاعه ، اول حاجة لازم تسأل العميل عن كذا حاجة وتفهم منه التالي :
مجال موقعك ايه وال URL ايه ؟
هنا لازم تطلب موقعك الاول علشان تفهم الموقع دا بيتكلم عن ايه ؟ وايه مجال الموقع واللى بيقدمة ، شكل الموقع ايه وعدد صفحاتة ؟ وهل المواضيع والكلام اللى موجود فى الموقع منقول من مواقع تانية.
عندك كام زائر دلوقتى فى الموقع ومصادرهم ايه ؟
ويفضل هنا انك تطلب منة يديلك تصريح دخول على جوجل اناليتكس علشان تقدر تدرس حالة الموقع الحالية اللى هو عليها قبل ما تشتغل ، وطبعا لو معندوش جوجل اناليتكس لازم قبل ما تشتغل تشغلهولة وتسيب الموقع كام يوم قبل ما تبدأ شغل علشان تعرف تثبت مدي تأثير الشغل اللى انت عاملة وتثبت لنفسك هل فى تقدم قبل وبعد والا لا.
ايه هو السوق المستهدف ليك؟
علشان تعرف تستهدف كلمات صح، وتعرف تشتغل Off-Page بطريقة صح وفى المكان الصح.
فى حد اشتغل SEO على الموقع قبل كده والا لا ؟
ودا مهم انك تعرفة علشان لو فى اى حد اشتغل علية بطريقة اضرت الموقع قبل ما يجيلك تكون عارف وتوضحلة كل شىء
بعد ما تسألة الاسئلة اللى فوق دي، ندخل على مرحلة المعمعه ، مرحلة جس النبض للطرفيين ، ودي بتكون اصعب مرحلة، لسا كل واحد فيكم مش فاهم التاني، هو مستعجل على النتائج ، وانت مش فى ايدك حاجة من اول كام يوم تقدمهالة ويحس فعلا انك بتشتغل وبتابع، خصوصاً ان مش كل حاجة فى السيو بتبان للعميل، علشان كده لازم تفهمة ان اول اسبوع دا هتستخدمة فى انك تعرف الكلمات المستهدفة وانك تدرس المنافيسن ، وطبعا لازم تشرك العميل فى الخطوة دي وتبعتلة اللى هتوصلة
السؤال المهم بقي , العميل هيسألك ويقولك النتائج هتبان امتي ؟
حاول تجاوب بعقلانية ، يعني مش علشان تكسب العميل ويـ Confirm ال Deal معاك ، تقولة بعد اسبوعين تلاتة والا شهر ، السيو مش مضمون نتائجة هتظهر امتي، وعن تجربة بتبقى متوسط من 3 الى 6 شهور شغل علشان يطلع صفحة اولي، طبعا دا ما يمنعش انها زى ما بنسميها ، ان الموقع يدخل فى مرحلة ( التنديع ) قبل الفترة دي ، ومعناها ان بعض الكلمات تبدأ تظهر فى نتائج متاخرة فى جوجل .
مرحلة التوتر :
العميل هيكون حابب يفهم كل حاجة انت بتعملها، وهو انت شغال اصلا والا مش شغال ، علشان كده لازم كل شهر بالكتير تبعتلة تقرير بحالة النتائج وبكل الشغل اللى انت بتعملة خلال الشهر ، والشهر اللى بعدة تبعتلة تقرير باللى انت عملتة مع مقارنة فى النتائج بين الشهر الحالي والشهر السابق
