التاجز او Tags هي عبارة عن كلمات وصفية بتربطها في مقالتك عشان تساعد في تصنيفها.
قديما جوجل كانت بتستخدم ال Tags كوسيلة تصنيف المحتوى وكانت تعتبر من عوامل التصدر ..
في الوقت ده كان أصحاب المواقع بيستخدموا 30 تاغ في الموضوع الواحد .
وكان في نتائج بحث متصدره تدخل عندهم تلاقي سحابة تاغ مليانة حوالي 200 او 300 كلمة.
بعد كده جوجل اتطور, و بقى بيفهم محتوى المقالة من المقالة نفسها..
واستمر دور التاغ في التصدر يقل ..
حتى صرحت جوجل انه لم يعد له دور في تقييم الصفحات و لا في الأرشفة.
بعد كده ظهر ناس بتقولك ان التاغز بيتم التعامل معاها كمحتوى متكرر و بتضر السيو
هنا في سؤالين
السؤال الأول : هل الناس دي صح ؟ يعني التاغ دلوقتي يعتبر محتوى متكرر ؟
السؤال الثاني : يعني بلاش Tags ؟ احذفها من الموقع ؟
الإجابة :
السؤال الأول : ايوه الناس دي صح و تعتبر محتوى متكرر
السؤال الثاني : لا متحذفهاش ابداً .. بس ممكن تستخدمها صح
الأول خلينا نتفق على حاجة, ان السيو طول عمره بيعتمد على قوانين وقواعد بنطبقها عشان نفهم جوجل الموقع بتاعنا بيتكلم عن ايه, وجوجل كل شوية بتغير قواعد وقوانين معينة عشان تحسن من فهمها لمحتوى الصفحات و تقدر توصل افضل نتائج الباحث او المستخدم.
تمام؟
الجديد ان جوجل بقت بتستخدم دلوقتي تكنولوجيا Deep Learning
يعني باختصار .. كمبيوتر جوجل بقى بيعلم نفسه ويطور من اللوغاريتمات و بيضيف قواعد لنفسه بهدف تحديد محتوى الصفحات.
و هو ده السبب اللي خلى جوجل تقول و هي مطمئنة , وصف الميتا يتم اختياره بواسطة محرك البحث من أي مكان في الصفحة.
جميل قوي .. انت بتقول الكلام ده ليه في مقال عن التاغ ؟
لان جوجل عندها عوامل معينة بتقيم بيها الصفحات والمواقع ..
و بعد تحديثات جوجل في السنوات الأخيرة ظهر قوانين جديدة في السيو باهداف جديدة..
بعد ما كان الهدف زمان انك تعرف زاحف جوجل محتواك بيتكلم عن ايه..
دلوقتي.. بعد ما هو بقى بيعرف لوحده بدون مساعدة..
بقى الهدف انك تسهل عملية الزحف على زاحف جوجل..
من احد اهم عوامل تسهيل الزحف هو هيكلة الموقع .. Site Structure
ببساطة انت بتشاور للزاحف و تشرحله و تقوله .. يا فندم هنا عندنا كذا وكذا..
و في آخر الممر ده عندنا كذا وكذا..
هدفك في هيكلة الموقع هو انك تخلي الموقع بتاعك منظم قدر الإمكان.
ازاي ؟
سلاحك الأول هيكون التصنيفات او Categories
التصنيفات كل لما كانت اقل ومليانة كل ما كان افضل للسيو.
طيب انا موقعي متنوع و فيه مقالات كثيرة .. أعمل ايه ؟
هنا بقى نرجع لموضوع المقال و اقولك Tags
التاغ بيتم استخدامه كسلاح تاني لنظيم الموقع وظبط الهيكلة.
المفروض تستخدم التاغ في ربط مقالات من تصنيفات مختلفة مع بعض.
بشرط انها تكون بتخدم موضوع واحد او قضية واحدة
ومايكونش فيه تصنيف ملائم ليها في التصنيفات الموجودة و تكون مش قادر تعملها تصنيف لوحدها عشان عدد المقالات قليل او عشان مالهاش مكان في طريقتك في تصنيف الموقع.
مثال توضيحي:
لو انت عندك موقع بيتكلم عن المحصولات الزراعية مثلاً
تصنيفاتك الرئيسية هتكون
خضروات
فواكه
بقوليات
وهكذا
كده جوجل تحبك قوي
طيب دلوقتي انت عندك 3 انواع خضار ونوعين فاكهه مناسبين قوي لمرضى السكر
ده تاغ
طيب نوعين فاكهة و نوع خضار مليانين فيتامين سي
ده تاغ تاني
وحاول تستخدم تاغ واحد او اتنين في المقالة
و لو مالهاش تاغ في دماغك .. يبقى مالهاش تاغ
ماتخترعش
واحد يقولليي امال ايه حكاية المحتوى المتكرر ده ؟
المقصود هنا الناس اللي بتستخدم تاغ موجود اصلا في التصنيفات
يعني واحد كاتب تصنيف خضروات … و كل المقالات في القسم ده واخدة تاغ خضروات برضه
هو بيبقى فاكر انه كده بياكد لجوجل ان دي خضروات وانه كده بيوثق الكلمة اكثر.
بس اللي بيحصل ان زاحف جوجل بيدخل تصنيف خضروات بيلاقي 20 موضوع بيارشفهم
وبعدين يخش على تاغ خضروات يلاقي نفس الكلام ف يارشفهم كمحتوى متكرر.
انما في الاستخدام الصحيح .. زاحف جوجل بيلاقي نفس المواضيع برضه لكن تحت تاغ مش موجود في التصنيفات .. ولا ينتمي لها اصلاً “.. و بيلاقي مواضيع من تصنيفات مختلفة.
فبيربط المواضيع بالكلمة اللي موجودة في التاغ وتعتبر نقطه إيجابية للسيو بتاعك لسببين.
اولا على مستوى المقالة , انت عرفت جوجل ان المحتوى بتاعك مهم للناس التي تبحث عن خضروات وفي نفس الوقت مهم للناس اللي بتبحث عن طعام لمرضى السكر.
ثانياً على مستوى الموقع .. انت عرفت زاحف جوجل ان موقعك منظم ومدروس .. وانك بتستخدم ادواتك بعقلانية وبحكمة و بالمقدار المطلوب فقط.
الخلاصة : استخدم التاغ بدراسة وتخطيط ونسق بينها و بين التصنيفات هتلاقي نفسك انت شخصيا مبسوط بموقعك وبالنظام اللي انت عامله.. وكان جوجل هيعتبرك موقع نموذجي وهيعدي عليك اكثر عشان يشوف عندك ايه جديد.
